तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
रसुवामा बिहान स्थानीय भोटेकोशी नदीमा अचानक ठूलो बाढी आएपछि ठूलो क्षति पुगेको अधिकारीहरूले बताएका छन्। क्षतिको विवरण आउन बाँकी नै छ।
राष्ट्रपति रामचन्द्र पौडेलले रसुवा र नुवाकोट हुँदै बहने भोटेकोशी र त्रिशूली नदीमा आएको बाढीले पुर्याएको क्षतिको खबरले आफूलाई अत्यन्त दुःखी बनाएको बताएका छन्।
पौडेलले उद्धार र राहतको कामलाई तीव्रता दिन सरकार, राजनीतिक दल, सामाजिक सङ्घसंस्था, सुरक्षा निकाय र सर्वसाधारण नागरिकहरूलाई आह्वान गरेका छन्।
राष्ट्रपतिले तल्लो तटीय क्षेत्रका सर्वसाधारणलाई सतर्क रहन तथा समन्वय र सहयोगमा जुट्न अनुरोध गरेका छन्।
सशस्त्र प्रहरी बलले आफ्ना १३ जना सुरक्षाकर्मी सम्पर्कविहीन भएको भन्दै खोज तथा उद्धारका लागि तयार अवस्थामा १०५ जना सुरक्षाकर्मीलाई काठमाण्डूस्थित त्रिभुवन विमानस्थलमा तैनाथ गरेको जनाएको छ।
सशस्त्र प्रहरी बलका सहप्रवक्ता शैलेन्द्र थापाले रसुवाको मैलुङबाट चार जना र टिमुरेबाट नौ जना सम्पर्कविहीन रहेको बताए।
उनले सडकमार्गबाट राजधानीको सिनामङ्गलस्थित विपद् हेर्ने गणबाट ४५ जनाको टोली नुवाकोटतर्फ प्रस्थान जानकारी दिए। उनले बीबीसीसँग भने, “बलम्बुमा १०० शय्याको अस्पताल हामीले स्ट्यान्डबाई राखेको छ।”
नेपाली सेनाले हालसम्म निजी क्षेत्रका आठ वटा र सेनाका चार गरी कुल १२ वटा हेलिकप्टर बाढी प्रभावित स्थानमा उद्धारकार्यका लागि परिचालन गरिएको जनाएको छ।
सेनाको हेलिकोप्टरमार्फत् स्याफ्रुबेँसीबाट-६, मैलुङबाट दुई जना र धुन्चेबाट चार जनाको उद्धार गरिएको नेपाली सेनाको सैनिक जनसम्पर्क निर्देशनालयले जनाएको छ।
रसुवामा आज बिहान भीषण बाढी आएपछि प्रधानमन्त्री वालेन्द्र शाहले मन्त्रिपरिषद्को आकस्मिक बैठक बोलाएका छन्।
उनको सचिवालयका अनुसार सिंहदरबारस्थित प्रधानमन्त्री तथा मन्त्रिपरिषद्को कार्यालयमा बैठक बस्ने छ।
यसअघि उनले विपद् जोखिम न्यूनीकरण तथा व्यवस्थापन राष्ट्रिय परिषद्को बैठक गरेका थिए।
गत वर्ष नेपाल-चीन सीमा नाका हुँदै बग्ने भोटेकोशी नदीमा भीषण बाढी आउँदा रसुवागाढी नाका अवरुद्ध भएको थियो भने १८ जना बेपत्ता भएका थिए।
नेपाल-चीन सीमाबाट ३६ किलोमिटर टाढा अवस्थित ल्हेन्दे खोलाको माथिल्लो जलाधार क्षेत्रमा रहेको हिमनदीबाट अचानक पानीको निकास भएको र त्यसका कारण हिमनदीको बाँध फुटेकाले उक्त विपद् निम्त्याएको अधिकारीहरूले बताएका थिए।
गत वर्ष असार २४ गतेको उक्त विपद्का कारण ३ प्रहरी, ६ कामदार, ३ जना कन्टेनरचालक र ६ चिनियाँ नागरिकको मृत्यु भएको थियो।
जिल्ला विपद् व्यवस्थापन समिति रसुवाको एउटा प्रतिवेदनका अनुसार त्यस बेला नवनिर्मित भन्सार, जलविद्युत् आयोजना, ईभी चार्जिङ स्टेशनसहितका संरचनासहितमा गरेर झन्डै ६ अर्ब ६२ करोड रुपैयाँको क्षति पुगेको थियो।
सरकारी निकायहरूले रसुवादेखि नुवाकोट, धादिङ र चितवनको मुग्लिङसम्म त्रिशूली नदीको किनारमा पर्ने स्थानमा विशेष सतर्कता अपनाउन अनुरोध गरेका छन्।
त्रिशूली नदीमा पानीको मात्रा बढेको र विपद्को जोखिम हुन सक्ने भन्दै जिल्ला प्रशासन कार्यालय चितवनले त्रिशूली र कालीगण्डकी नदी मिसिएपछि बन्ने नारायणी नदीको तटबाट मानिसहरूलाई सुरक्षित स्थानमा सर्न भनेको छ।
एउटा सूचना जारी गर्दै जिल्ला प्रशासन कार्यालयले नदी आसपास नजान र गएको भए तत्काल सुरक्षित स्थानमा पुग्न अनुरोध गरेको छ।
प्रशासनले नदी आसपासका क्षेत्रमा बसोबास गर्ने र निर्माणाधीन तथा सञ्चालित आयोजनाहरू र नदीको तटीय क्षेत्रमा रहेका कार्यालयहरूलाई समेत आवश्यक पूर्वतयारी र सावधानी अपनाउन भनेको छ।
“स्थानीय तहहरूले नदी किनारमा बसोबास गर्ने स्थानीय व्यक्तिहरूलाई सुरक्षित स्थानमा सार्नुहोला,” प्रशासनको सूचनामा भनिएको छ।
विपद् प्राधिकरणकी प्रवक्ता शान्ति महतले जनाए अनुसार प्रारम्भिक रूपमा हेर्दा तिब्बतमा पहिला हिउँपहिरोले नदी थुनिएको र अहिले "हिउँ पग्लिएका कारण" रसुवामा बाढी आएको अनुमान गरिएको छ।
गत वर्ष पनि यस्तै प्रकृतिको घटना भएको स्मरण गर्दै उनले भनिन्, "हामीले यसबारे तिब्बत चीनसँग 'ट्रान्स बाउन्ड्री' छलफल गर्नुपर्ने भएको छ। ...उतापट्टिको भएकाले हामीलाई बाढी आइसकेपछि मात्रै (थाहा) भएको छ। यस्ता समस्याहरू बढेको भएर हामीले चीन सरकार र नेपाल सरकारबीच एमओयू गरेर अघि बढ्नुपर्ने आवश्यकता देखिएको छ।”
उनले रसुवागढीमा भन्सार कार्यालय र आसपासका प्रहरी चौकी र हेल्थ पोस्टहरूमा क्षति पुगेको बताइन्। उनका अनुसार तिब्बतबाट बिहान ८:४० बजे बाढी प्रवेश गरेको थियो भने सरकारी निकायले ९ बजेतिर सूचना पाएको थियो।
उनले विपद्सँग सम्बद्ध सबै निकायहरूलाई परिचालन गर्ने र निजी क्षेत्रका ३४ वटा हेलिकप्टरहरूलाई अन्यत्र कतै परिचालन नगर्न निर्देशन दिइएको बताइन्।
नमस्कार। तपाईँलाई बीबीसी न्यूज नेपालीको यो लाइभ पेजमा स्वागत छ। रसुवामा आज बिहान स्थानीय भोटेकोशी नदीमा अचानक ठूलो बाढी आएपछि ठूलो क्षति पुगेको हुन सक्ने अधिकारीहरूले बताएका छन्। उक्त नदी धुन्चे कटेपछि त्रिशूली बन्छ। यो पेजमा हामी बाढीसँग सम्बन्धित ताजा विवरण प्रस्तुत गर्ने छौँ।
