Cais cynllunio dadleuol i godi tai yn Aberystwyth wedi'i dynnu'n ôl

Yn Aberystwyth, mae cais cynllunio dadleuol ar gyfer datblygiad tai newydd ar dir sy'n cael ei ddefnyddio gan bobl leol wedi'i dynnu'n ôl.

Roedd Cyngor Ceredigion a Chymdeithas Tai Wales and West wedi gwneud cais i adeiladu mwy na 70 o dai newydd ar gae Erw Goch - cae yn Waunfawr uwchlaw pentref Llanbadarn Fawr.

Pan gafodd y cynlluniau eu cyflwyno'n wreiddiol yn 2021 fe drefnodd pobl a oedd yn byw gerllaw ymgyrch i'w gwrthwynebu, gan ddweud bod y cae yn cael ei ddefnyddio gan bobl leol ar gyfer ymarfer corff a hamdden.

Mewn ymgais i atal y datblygiad tai fe wnaeth y gwrthwynebwyr gais i gael y cae wedi'i ddynodi'n faes pentref (village green) ond cafodd y cais ei wrthod gan Gyngor Ceredigion.

Yn sgil hynny fe anfonodd ymgyrchwyr lythyr at y cyngor yn amlinellu meysydd lle gellir herio'r penderfyniad mewn adolygiad barnwrol.

Bellach mae Cyngor Ceredigion wedi cadarnhau bod y cais cynllunio wedi'i dynnu'n ôl.

Mae porth cynllunio Cyngor Ceredigion yn dangos bod y cais wedi'i dynnu'n ôl ar 1 Mehefin.

Mae Elin Mabbutt wedi byw ger Erw Goch ers 12 mlynedd, ac mae'n aelod o'r grŵp ymgyrchu.

Wrth siarad â Cymru Fyw dywedodd bod y cae wedi bod yn bwysig i'w theulu ers iddyn nhw symud i fyw gerllaw ac felly mae hi'n croesawu'n fawr bod y cais wedi'i dynnu'n ôl ond mae'n rhybuddio bod rhaid bod yn ofalus.

"Rydym wrth ein bodd fod y cais cynllunio wedi ei dynnu'n ôl a bod modd i'r gymuned leol barhau i ddefnyddio a mwynhau cae Erw Goch - ardal werdd sy'n hanfodol i iechyd meddwl a chorfforol pobl leol.

"Ond mae'n drueni fod Cyngor Sir Ceredigion wedi gwastraffu cymaint o arian trethdalwyr yn brwydro yn erbyn dymuniadau'r gymuned."

Ychwanegodd na ddylid bod yn rhy optimistaidd a bod "pryderon y bydd cais newydd yn cael ei gyflwyno yn y pen draw".

"Ond os daw cais newydd, fe fyddwn unwaith eto, fel cymuned, yn parhau i ymladd er mwyn sicrhau fod yr ardal werdd hon, sydd wedi bod yn lle hamdden i drigolion lleol ers degawdau, yn cael ei hamddiffyn ar gyfer y dyfodol."

Doedd Cyngor Sir Ceredigion ddim am ymateb i'r sylwadau uchod a doedd Tai Wales and West ddim am wneud unrhyw sylw ar y mater.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.