တိုက်ရိုက်ထုတ်လွှင့်မှု, ကျောက်တော်၊ သံတွဲနဲ့ ဂွ ကို လေကြောင်းကနေဗုံးကြဲ

တိုက်ရိုက် ထုတ်လွှင့်ချက်

1. လွန်ခဲ့သော တစ်မိနစ် ကကရင်မှာ DKBA ဘာကြောင့် အင်အားကြီးလာလဲ

   

   ဓာတ်ပုံ ရင်းမြစ်, ကလိုထူးဘောဌာနချုပ်

   မြဝတီမြို့တောင်ပိုင်းက ထိုင်းနိုင်ငံနဲ့ နယ်နိမိတ်ထိစပ်နေတဲ့ ကျောက်ခတ်ရွာ ဟာ အရင်က တောင်ယာလုပ်ငန်းကို လုပ်ကိုင်ခဲ့ပေမဲ့ အခုတော့ အမေရိကန်က ဆုကြေးထုတ်ထားရတဲ့နယ်မြေတစ်ခုဖြစ်လာပါတယ်။

   ၂၀၂၁ ခုနှစ်၊ စစ်တပ် အာဏာသိမ်းပြီးတဲ့နောက်မှာတော့ အဲဒီရွာမှာ ကျားဖြန့်ငွေလိမ်လုပ်ငန်းတွေ ကြီးထွားလာခဲ့ပြီး ဒီရွာဟာ ဒီမိုကရေစီအကျိုးပြုကရင်တပ်မတော် (DKBA) အတွက် စီးပွားရေးအချက်အချာနေရာ ဖြစ်လာခဲ့ပါတယ်။

   တရုတ်ကျားဖြန့်လုပ်ငန်းတွေနဲ့ DKBA လက်တွဲ လုပ်ကိုင်ချိန်ကစလို့ ဝင်ရောက်လာတဲ့ တပ်သားအသစ်တွေ တဖြည်းဖြည်းများလာပြီး လွန်ခဲ့တဲ့ ဆယ်စုနှစ်နဲ့ယှဥ်ရင် တပ်ဖွဲ့အင်အား ငါးဆကျော်များလာပါတယ်။

   DKBA ရဲ့ သစ္စာ အဓိဋ္ဌာန် လေးရပ်မှာ "ကိုယ့်ကျင့်တရားကောင်းအောင် စောင့်ထိန်းပါမည်" ဆိုတဲ့တချက်ပါဝင်ပေမဲ့ ကျားဖြန့်ငွေလိမ်ဂိုဏ်းတွေနဲ့အလုပ်တွဲလုပ်ရင်း အင်အားကြီးလာခဲ့ပါပြီ။

   ဆောင်းပါးအပြည့်အစုံကို ဒီလင်ခ့် မှာဖတ်နိုင်ပါပြီ။

2. လွန်ခဲ့သော ၄၈ မိနစ် ကကျောက်တော်၊ သံတွဲနဲ့ ဂွ ကို လေကြောင်းကနေဗုံးကြဲ

   

   ဓာတ်ပုံ ရင်းမြစ်, AA Info Desk

   အာရက္ခတပ်တော်(အေအေ) ထိန်းချုပ်ထားတဲ့ ကျောက်တော်၊ သံတွဲနဲ့ ဂွမြို့တွေကို စစ်တပ်က မနေ့ညက လေကြောင်းကနေဗုံးကြဲခဲ့တယ်လို့ ဒေသခံတချို့ကပြောပါတယ်။ အေအေဘက်က ဒီလေကြောင်းတိုက်ခိုက်မှုတွေနဲ့ ပတ်သက်လို့ထုတ်ပြန်လာတာမရှိသေးဘဲအထိအခိုက်အသေးစိတ်အခြေအနေကို မသိရသေးပါဘူး။

   ရခိုင်ပြည်နယ်ထဲကို ဧရာဝတီတိုင်းကတဆင့် ဝင်ရောက်ဖို့ စစ်ကြောင်းထိုးနေတဲ့ စစ်တပ်နဲ့ ရေကြည်၊ သာပေါင်းမြို့နယ်တွေထဲမှာ ဒီရက်ပိုင်း တိုက်ပွဲဆက်တိုက်ပြင်းထန်လာနေတယ်လို့ အေအေက သြဂုတ် ၁၃ ရက်မှာ ထုတ်ပြန်ပါတယ်။ သြဂုတ် ၁၂ ရက် တစ်ရက်တည်းမှာတင် ဒီမြို့နယ် ၂ ခုထဲက နေရာ ၅ ခုမှာ တနေ့လုံးနီးပါး တိုက်ပွဲ ဖြစ်ပွားခဲ့တယ်လို့ အေအေကဆိုပါတယ်။

   ရေကြည်မြို့နယ်ထဲက ပွိုင့် (၁၀၁) အနီးဝန်းကျင်နှင့် သာပေါင်းမြို့နယ်၊ သာပေါင်းကလေး ကျေးရွာအနီးဝန်းကျင်တွေမှာ တိုက်ပွဲဖြစ်နေတာပါ။ တပ်မ (၆၆) လက်အောက်ခံ တပ်ရင်းတွေက မြေပြင်စစ်ကြောင်းထိုးလာပြီး တိုက်ပွဲဖြစ်ပွားချိန်မှာ လေကြောင်း၊ မြေပြင်လက်နက်ကြီးပစ်ကူတွေ တပြိုင်နက်သုံးပြီး စစ်တပ်ဘက်ကတိုက်နေတယ်လို့ အေအေရဲ့ ထုတ်ပြန်ချက်မှာပြောပါတယ်။

   သြဂုတ် ၁၂ ရက်၊ သာ‌ပေါင်းမြို့နယ်ထဲက တိုက်ပွဲမှာတော့ စစ်တပ် စစ်ကြောင်းဟာ အကျအဆုံးနဲ့ ပြန်ဆုတ်ခွာပြီး ဒီစစ်ကြောင်းကနေ လက်နက်တချို့သိမ်းဆည်းရမိတယ်လို့ အေအေက ဓာတ်ပုံနဲ့ တကွ ထုတ်ပြပါတယ်။

   အေအေက နယ်မြေအများစုသိမ်းပိုက်ထားတဲ့ရခိုင်ပြည်နယ်ရဲ့ ပြည်နယ်ထွက်ပေါက်တွေဟာ ချင်းပြည်နယ်၊ ဧရာဝတီတိုင်း၊ မကွေးတိုင်းနဲ့ ပဲခူးတိုင်းစတဲ့ ဆက်စပ်နယ်မြေတွေဖြစ်ပါတယ်။ စစ်တပ်ဟာ ဒီနယ်မြေတွေက တဆင့် ရခိုင်ပြည်နယ်ထဲကို ဝင်ရောက်ဖို့ ထိုးစစ်ဆင်လာတာ တစ်နှစ် ကျော် နှစ်နှစ်နီးပါးရှိပြီလို့ အေအေက ထုတ်ပြန်ချက်မှာပြောထားပါတယ်။

3. လွန်ခဲ့သော ၅၀ မိနစ် က

   မင်္ဂလာပါ။ ဩဂုတ် ၁၄ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။