ရွှေကူမြို့ကို ဦးတည်လာတဲ့ စစ်တပ်နဲ့ ကေအိုင်အေ တိုက်ပွဲဖြစ်
ဓာတ်ပုံ ရင်းမြစ်, Getty Images
ရှမ်းပြည်နယ်မြောက်ပိုင်း၊ မဘိမ်းမြို့နယ်ထဲက ငါးအိုးရွာကနေ ကချင်ပြည်နယ်၊ ရွှေကူမြို့ကို ဦးတည်လာတဲ့ စစ် ကြောင်းနဲ့ ငါးအိုး-ရွှေကူလမ်းမှာ တိုက်ပွဲပြင်းထန်နေတယ်လို့ ကချင်လွတ်လပ် ရေးတပ်(ကေအိုင်အေ) ပြန်ကြားရေးတာဝန်ခံ ဗိုလ်မှူးကြီး နော်ဘူက ဘီဘီစီကို ပြောပါတယ်။
ကေအိုင်အေ အမှတ် ၁၁ တပ်မဟာ လှုပ်ရှားနယ်မြေဖြစ်တဲ့ ရွှေကူမြို့နယ်ထဲက ရွှေကူမြို့အဝင် လမ်းမကြီးနဲ့ ငါးအိုး-ရွှေကူ လမ်းမကြီးကို မနေ့တုန်းကစပြီး ရက်အကန့်အသတ်မရှိ သွားလာခွင့် ပိတ်တယ်ဆိုတဲ့ထုတ်ပြန်ချက်ကိုလည်း ကေအိုင်အေဘက်က ထုတ်ထားပါတယ်။
ဒါနဲ့ပတ်သက်လို့ ဗိုလ်မှူးကြီးနော်ဘူက” စစ်တပ်က ရွှေကူမြို့ပေါ် နေရာအတော်များများကို တပ်ဖြန့်ထားတယ်” လို့ ပြောပြီး မြို့ပေါ် တိုက်ပွဲဖြစ်နိုင်ခြေကိုလည်း သူက သုံးသပ်ပါတယ်။
ကေအိုင်အေကတော့ တိုက်ပွဲဖြစ်နိုင်ခြေကြောင့် ရွှေကူမြို့ကနေ အရပ်သားတွေ တိမ်းရှောင်ကြဖို့ က မနေ့ကတည်းက စာထုတ် သတိပေးပါတယ်။
ဒါပေမဲ့ ရွှေကူမှာ မြို့ခံတွေအပြင် ဗန်းမော်၊ မိုးမောက်၊ မံစီ စတဲ့ဒေသတွေက စစ်ရှောင်မိသားစုတွေ လာရောက်နေထိုင်နေကြတာကြောင့် ဒီလူတွေဟာ နှစ်ထပ်ကွမ်းစစ်ရှောင်ဖြစ်ရမယ့်အခြေအနေကို ရင်ဆိုင်ရနိုင်ခြေရှိနေပါတယ်။
ကချင်ထဲက မြို့ပေါ်တိုက်ပွဲတွေအကြား စစ်ရှောင်အရပ်သားတွေကို ပြောင်းရွှေ့ပေးရတဲ့ အတွေ့ အကြုံရှိတဲ့ ပရဟိတအသင်းတစ်သင်းကတော့ အရေးကြီးစာရွက်စာတမ်းတွေ၊ တန်ဖိုးကြီးပစ္စည်းတွေကို အရေးပေါ်အိတ်နဲ့ ပြင်ဆင်ထားကြဖို့ သတိပေးနှိုးဆော်ပါတယ်။
စစ်ကိုင်းထဲက တကောင်းမြို့နဲ့ ထီးချိုင့်မြို့ကို သိမ်းလာတဲ့ စစ်တပ်ဟာ အင်အား ၁,၀၀၀ ဝန်းကျင်နဲ့ ငါးအိုး-ရွှေကူလမ်းမကြီးအတိုင်း ရွှေကူမြို့ကို မေလကုန်ပိုင်းကစလို့ တက်လာတာဖြစ်ပြီး ကေအိုင်အေနဲ့ ထိတွေ့တိုက်ပွဲတွေ ဖြစ်နေပါတယ်။
ဇွန်လထဲမှာတော့ ရှေ့ရောက်လာတဲ့စစ်ကြောင်းအခြေအနေကြောင့် မြို့ပေါ်က အရပ်သားတွေ ကြိုတင်တိမ်းရှောင်ဖို့ ကေအိုင်အေက သတိပေးလာတာဖြစ်ပါတယ်။
