တိုက်ရိုက်ထုတ်လွှင့်မှု, မုံရွာက တော်လှန်ရေးတပ်အချင်းချင်းစီးနင်းမှု ပလဖ ၃ ဦးအပါ ၆ ဦးသေဆုံးတယ်လို့ဆို

တိုက်ရိုက် ထုတ်လွှင့်ချက်

1. လွန်ခဲ့သော တစ်နာရီ ကမုံရွာက တော်လှန်ရေးတပ်အချင်းချင်းစီးနင်းမှု ပလဖ ၃ ဦးအပါ ၆ ဦးသေဆုံးတယ်လို့ဆို

   

   ဓာတ်ပုံ ရင်းမြစ်, မုံရွာမြို့နယ် ပလဖ

   စစ်ကိုင်းတိုင်း၊ မုံရွာမြို့နယ်ထဲမှာရှိတဲ့ မြို့နယ်ပြည်သူ့လုံခြုံရေးအဖွဲ့(ပလဖ)စခန်းနဲ့ တိုက်နယ် ၄ ပလဖစခန်းအပါအဝင် နေရာ ၃ နေရာမှာ မနေ့ ဇွန်လ ၂၉ ရက်က စီးနင်းခံရပြီး ပစ်ခတ်မှုတွေဖြစ်ခဲ့တာကြောင့် အရပ်သား ၂ ဦးနဲ့ ပလဖအဖွဲ့ဝင် ၃ ဦးအပါအဝင် ၆ ဦးသေဆုံးသွားတယ်လို့ မြေပြင်သတင်းရင်းမြစ်တချို့က ပြောပါတယ်။

   မုံရွာမြို့နယ် ပလဖ အဖွဲ့ဝင်တစ်ဦးကတော့ ဒီစီနင်းမှုကို NUG ရဲ့ မုံရွာခရိုင်တပ်ရင်း ၅ ရင်းပေါင်းပြီး လုပ်ဆောင်ခဲ့တာလို့ ပြောပါတယ်။

   “တပ်ရင်း ၂၂၊ ၂၃၊ ၂၄၊ ၂၅၊၂၈ ရင်းတွေ ဝင်ပြီးစီးနင်းတာ၊ ဘာကြောင့်စီးနင်းလဲဆိုတာတော့ မသိရသေးဘူး၊ ပလဖ မြို့နယ်တာဝန်ခံ ကိုအာကူးနဲ့ ဒီတပ်ရင်းတွေကြားမှာ မပြေလည်မှုတချို့ရှိနိုင်တယ်” လို့ သူက ဆက်ပြောပါတယ်။

   စီးနင်းမှုအတွင်း မြို့နယ်ပလဖစခန်းက ပလဖအဖွဲ့ဝင် ၃ ဦးသေဆုံးပြီး တိုက်နယ် ၄ ပလဖ အချုပ်ထောင်က အချုပ်သားတစ်ဦး သေဆုံးတယ်လို့ မြို့နယ်ပလဖ အဖွဲ့ဝင်တစ်ဦးက ပြောပါတယ်။

   အရပ်သား ၂ ဦးသေဆုံးမှုနဲ့ပတ်သက်လို့ စီးနင်းတဲ့အဖွဲ့က စားသောက်ဆိုင်တစ်ဆိုင်မှာ ထိုင်နေတဲ့ ပလဖတပ်ဖွဲ့ဝင်တချို့ကို ပစ်ခတ်ရာကနေ ဘေးကပ်လျက်က တုတ်ထိုးဆိုင်မှာထိုင်နေတဲ့ အရပ်သား ၂ ဦးပါ ကျည်ထိမှန်ပြီး သေဆုံးသွားတာလို့ မြေပြင်သတင်းရင်းမြစ်တစ်ဦးက ဆိုပါတယ်။

   “အသက် ၂၈ နှစ်အရွယ် အမျိုးသား ၂ ဦး” လို့ သူက ဖြည့်ပြောပါတယ်။ လက်ရှိမှာ စီးနင်းခံရတဲ့ မြို့နယ်ပလဖတာဝန်ခံ ကိုအာကူးကတော့ ပျောက်ဆုံးနေပြီး ဖမ်းဆီးခံရလား၊ သေဆုံးပြီလားဆိုတာကို အတည်မပြုနိုင်ဘူးလို့ မြို့နယ်ပလဖ အဖွဲ့ဝင်တစ်ဦးက ပြောပါတယ်။

   မုံရွာမြို့နယ်ထဲက တော်လှန်ရေးတပ်အချင်းချင်းစီးနင်းမှုနဲ့ ပတ်သက်လို့ အမျိုးသားညီညွတ်ရေးအစိုးရ(NUG)ရဲ့ ဝန်ကြီးချုပ်ရုံးနဲ့ မုံရွာမြို့နယ်ပလဖအဖွဲ့တာဝန်ရှိသူတို့ကို ဆက်သွယ်မေးမြန်းထားပေမယ့် ဇွန်လ ၃၀ ရက်မနက်ပိုင်းအထိ ပြန်လည်ဖြေကြားတာ မရှိသေးပါဘူး။

2. လွန်ခဲ့သော တစ်နာရီ က

   မင်္ဂလာပါ။ ဇွန်လ ၃၀ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။