Birləşmiş Krallıq: Aİ-də qalıb-qalmamaqla bağlı referendum davam edir

Çap edildi 23 Iyun 2016

Birləşmiş Krallıqda ölkənin Avropa İttifaqında qalmalı yoxsa çıxmalı olduğunu müəyyən etmək üçün tarixi referendum davam edir.

Seçki məntəqələri ölkənin yerli vaxtla saat 07:00-dan başlayaraq axşam saat 22:00-a qədər davam edəcək.

Səsvermədə təqribən 46 milyon 499 min 537 nəfər səsvermə hüququna malikdir və bu Böyük Britaniya üçün rekord səsvermə rəqəmi hesab olunur.

Səsvermənin davam etdiyi zaman digər yayım şirkətləri kimi BBC-nin məlumat vermək imkanı məhduddur. BBC Azərbaycan xidmətinin səhifəsində Bakı vaxtı ilə səhər saat 8:30-dan nəticələri izləyə bilərsiniz.

Referendumun səsvermə bülletenində soruşulur: "Birləşmiş Krallıq Avropa İttifaqında qalmalıdır yoxsa Avropa İttifaqından çıxmalıdır?"

Bu, Birləşmiş Krallığın tarixində keçirilən sayca 3-cü referendumdur. Son 4 ay ərzində "Qalsın" və "Çıxsın" kampaniyaları qızğın mübarizə aparıb.

Chelsea Pensioners — Şəklin alt yazısı, Chelsea Təqaüdçüləri qrupu Aİ üzvlüyü üzrə referendumda səs verəndən sonra seçki məntəqəsini tərk edir. London, 23 iyun 2016

Nigel Farage votes — Şəklin alt yazısı, UKIP (Birləşmiş Krallıq Müstəqillik Partiyası) lideri Nigel Farage Biggin Hill, Kent ərazisindəki seçki məntəqəsində səs verib

David and Samantha Cameron — Şəklin alt yazısı, Baş nazir David Cameron və yoldaşı Samantha Cameron Londonda səs verib

Şəklin alt yazısı, Leyboristlər partiyasının lideri Jeremy Corbyn Londonda səs verib

Ümumi səslərin yarıdan çox hissəsini toplayan tərəf qalib sayılacaq.

Referendum seçki məntəqələri axşam saat 22:00-da bağlandıqdan sonra seçki qutuları toplanacaq və nəqliyyat vasitəsilə səsvermə nəticələrinin hesablama məntəqələrinə aparılacaq.

Skip Ən çox oxunan and continue reading

Ən çox oxunan