Sababa muddama Giddugala Bahaan dorgommiin Sa'udiitii baafame

Haguuggii Tamsaasa Kallattii

1. 17 Fuulbaana 2026Muddama Giddugala Bahaan dorgommiin Sa'udiirraa baafame

   Dorgommiin marsaa xumuraa Shaampiyoonaa Konkolaataa Addunyaa jalqaba Sa'udi Arabiyaatti gaggeeffamuuf yaadamee ture gara Xaaliyaanitti geeffame.

   Silaa Sa'udi Arabiyaan dorgommii xumuraa shaampiyoonaa kanaa baatii Sadaasa keessa qopheessiti jedhamee ture.

   Sa'udiin sagantaa kana ''qopheessuuf qophii'' taatus haala naannicha keessa adeemaa jirurraa kan ka'e murtaa'uu dhaabbanni ispoortii motoraa hoogganu, FIA, beeksiseera.

   Torbanoota muraasa darban haleellaan hidhattoonni Huutii qarqara Galaana Diimaatti raawwatan cimeera.

   Sa'udiin immoo waraana mootummaa Yaman deeggarti, lammiilee ishee gama daangaa Yaman jiranis akeekkachiisteetti.

2. 17 Fuulbaana 2026Poolisiin Afrikaa Kibbaa osoo qoratuu reeffi dubartii saglaffaa argame

   Poolisiin Afrikaa Kibbaa ji'a lama keessatti reeffi dubartii saglaffaa argamuu mirkaneesse.

   Reeffi dubartootaa baha magaalaa Johaanisbargitti argamuun yaaddoo guddaa uumeera.

   Dubartiin reeffishee amma argame dugdaa ol uffata ofirraa hin qabdu, ansoolaan (sharaa) reeffishee maramee daandii qarqara argame.

   Eenyummaan dubartii kanaa ammallee hin ibsamne.

   Reeffi dubartoota baay'ee argame uffati gar tokko irra hin jiru, miidhamnis irraa mul'ata.

   Poolisiin garuu hanga yoonaa duuni dubartoota kanneeni yoo walqabata ta'e hin mirkaneessine.

   Pirezidantiin Afrikaa Kibbaa Siriil Ramaposaa kanneen ajjeechaa duuba jiran adda baasuf 'dhagaan nuti hin buqqifne hin jiru' jedhaniiru.

   Dubartoota du'anii reeffi isaanii argame keessaa tokko dubartii ganna 38 Elizaabet Moselakgomoodha.

   Dubartiin kuni waaree booda fiiguuf manaa baatee achumaan dhabamte. Guyyoota sadii booda reeffishee duuba hoteela tokko argame.

3. 17 Fuulbaana 2026Yunaayitid dhuguma dhiphachuu hin qabuu?

   Maanchistar Yunaayitid baranas qormaataan eegaleera.

   Leenjisaan isaa Kaarik garuu ammallee 'wanti na dhiphisu hin jiru' jechaa jira.

   Dubbisuuf: Maayikil Kaarik maal jechaa jira?

4. 17 Fuulbaana 2026Akkaataan ati itti hargantu dogoggora ta'uu malaa?

   Funyaan kee godoo balbala lamaa qarumatti fuulakeerra taa'u miti. Kutaa qaamaa akka ajaa'ibaatti wal xaxaa tahedha.

5. 17 Fuulbaana 2026Tiraamp waraanni Iraan 'xumuraamuuf akka jiru' ibsan

   Filannoon walakkessaa Ameerikaattii gaggeefamuuf jiru Pirezdaantiin Ameerikaa Doonaald Tiraamp waraana Iraan karaa kamiinuu akka xumuran kan dirqamsiisaa jiru fakkaata.

   Tiraampis waraanichi gara xumurarra gahuu isaa abdii qaban ibsan.

   Akka gabaasaaleen miidiyaa ibsanitti, Tiraamp torban dhufu yaa’ii waliigalaa UN cinatti hoggantoota Galoo Galaanaa waliin wal arguun xumura waraanichaa irratti mari’atu jedhamee eegama.

   Tiraamp sagantaa duula filannoo walakkeessaa Kaaba Kaarolinaatti gaggeeffame irratti ammas Iraan waliigaltee akka barbaaddu dubbataniiru.

   ''Xumura waraanichaatti akka dhihaanne abdiin qaba. Warri Iraanis waliigaltee irra gahuu barbaadu. Akkamitti akka deemnu ni ilaalla'' jedhan.

   Tiraamp irra deddeebiin Iraan waliigaltee barbaaddi jedhanii dubbatanis, ji'oota torban darbe keessatti yaaliin waraanicha karaa waligalteen xumuramuu hanga yoonaa hojirraa hin oolle.

   Lammileen Ameerikaa qaala'iinsa jireenyaa, baasii daballii boba'aa fi taarifa dabalatee sababa cufamuu ulaa Hormuuz kaadhimamaa Rippabilikaanotaa hedduudhaaf qormaata uumaa jira.

6. 17 Fuulbaana 2026Haleellaan Sa'uudii fi Huutii waraana Baha Giddugaleessaa hammeessaa jira

   Sa'uudii Arabiyaan xiyyaaraan Yaman irratti wayita haleellaa raawwattu, Huutiin ammoo dirooniiwwan fi misaayeloota magaalota Sa'uudiitti dhukaaseera.

   Haleellaan Sa'uudii fi hidhattoota Huutii Yaman gidduutti hammaate kun waraana Baha Giddugaleessaa daran babal'isaa jira.

   Haleellaan hammaannaan Ameerikaanis imala gara Sa'uudiitti taasifamu irratti akeekkachiisa cimsiteetti.

   Keessattuu hojjettoonni mootummaa daangaa Yamanitti kiilomeetira 32 dhihaatanii akka hin imalle akeekkachiiste.

   Qubsuma isaanii daran babal'ifataa kan jiran hidhattoonni Huutii Yaman torbee darberraa eegaluun Sa'uudii fi mootummaa Yamanii Sa'uudiin deeggaramu irratti haleellaa raawwataa jiru.

   Magaalaa Sana'aa fi kutaalee kaaba Yaman to'atanii kan jiran Huutiin, allattii kibbaattis socho'uun ulaa Galaana Diimaa akkaan murteessaa ta'e Baab el-Mandab to'ataniiru.

   Kanaanis Afrikaatti baayyee dhihaataniiru. Afrikaatti qofa osoo hin taane buufataalee waraanaa biyyoonni humna qaban naannawa kana keessaa qabanittis siqaniiru.

7. 17 Fuulbaana 2026Yooyyaa!

   Tamsaasa kallattii eegalleerra. Haleellaa Huutii fi Sa'uudii Arabiyaa irratti odeeffannoo jiru akkasumas waraana Baha Giddugaleessaa, dhimmoota addunyaa fi biyya keessaa irratti xiyyeeffachuun odeeffannoo isin biraan geenya.

   Tamsaasa kallattii duraan dhiheessaa turre irraa karaa kanaan odeeffannoo argachuu dandeessu.

   Akkasumas odeessaalee keenya karaa Marsariitii (Website), YouTube, Facebook, WhatsApp fi TikTok keenyaas ni argattu.